Facebook սոցկայքը և դրա հետ կապված WhatsApp մեսենջերն օգտագործում են Մերձավոր Արևելքում և Աֆրիկայում մարդկանց մաքսանենգություն կազմակերպելու նպատակով։ Այս մասին հաղորդում է AFP-ն՝ վկայակոչելով Միգրացիայի միջազգային կազմակերպության քարտուղար Լեոնարդ Դոյլին։
Դոյլի խոսքով՝ մաքսանենգությամբ զբաղվող հանցախմբերն սոցկայքը և մեսենջերն օգտագործում են պոտենցիալ հաճախորդների շրջանում իրենց ծառայությունների մասին տեղեկություն տարածելու համար։ Գործնականում հանցագործները հաճախ են օգտագործում ներգաղթյալներին, բռնության ենթարկում և պատանդ պահում, որպեսզի շանտաժի միջոցով նրանց հարազատներից գումար շորթեն։
Նա նաև ասել է, որ հանցագործների հասանելիությունը Facebook-ի ծառայություններին դյուրացված է՝ ընկերությանը կոչ անելով օգտահաշիվների շարքում գտնել մարդկանց ապօրինի տեղափոխողների էջերը և արգելափակել։ Դոյլը վստահ է, որ սոցկայքը նման խմբավորումների հետ պետք է վարվի այնպես, ինչպես ծայրահեղական կազմակերպությունների դեպքում։
Աղբյուրը՝ 1in.am