Տորոնտոյում տեղի է ունենում հոբելյանական 40-րդ միջազգային կինոփառատոնը, որին մասնակցում են աշխարհի շուրջ 60 երկրներ՝ ավելի քան 300 ֆիլմերով: Փառատոնի մեկնարկը տրվել է կանադացի ռեժիսոր Ժան Մարկ Վալլեի «Ավերածություն» ֆիլմի համաշխարհային պրեմիերայով :
[/vc_column_text]
Պատահական չէ այս ֆիլմի՝ որպես մեկնարկային ֆիլմի ընտրությունը: Այն պատմում է ներդրումային բանկիրի մասին, որը դեպրեսիայի մեջ է ընկել ամուսնու զոհվելուց հետո: Ինչպես ռեժիսորն է բնութագրում՝ ֆիլմը ուժեղ ու ողբերգական պատմություն է՝ գրված մարդկային հոգեբանությունը հասկանալու, մարդկային բացառիկությունը, առանձնահատությունները գիտակցելու անկեղծ ցանկությամբ և փորձել հասկանալու, թե ինչն է մարդուն ստիպում սիրել: Շատ քննադատներ արդեն կանխագուշակում են, որ «Ավերածությունը» կդառնա «Օսկար» մրցանակի գլխավոր հավակնորդներից մեկը:
Տորոնտոյի միջազգային կինոփառատոնում արդեն կայացել են նաև իսպանական «Մա Մա», հոլիվուդյան «Սև պատարագ» և ավստրալիական «Դերձակը» ֆիլմերի պրեմիերաները։
Կինոփառատոնի կարմիր գորգը զարդարել են այնպիսի հյուրեր, ինչպիսիք են Ջոնի Դեփը, Մեթ Դեյմոնը, Ջուլիանա Մուրը, Քրիստոֆեր Ուոքենը, Նատալի Փորթմանը, Սանդրա Բուլոկը, Սթիվ Մարտինը , Պենելոպե Կրուսը, Քեյթ Ուինսլեթն ու Ամբեր Հարդը, Լիամ Հեմսվորթը, Ռեյչլ ՄքԱդամսն ու Դակոտա Ջոնսոնը և շատ ուրիշներ:
Կինոփառատոնի գլխավոր մրցանակը բաժին կհասնի այն կինոնկարին, որը կհաղթի հանդիսատեսի քվեարկության արդյունքում:
Անցած տարի հանդիսատեսի համակրանք մրցանակն ստացել էր նորվեգացի ռեժիսոր Մորտեն Տիլդումի «Խաղի նմանակում» դրաման:
ԱՐՓԻ
