«Թեև անգլերեն եմ գրում, բայց ես ինձ համարում եմ հայ գրող: Գործածածս խոսքերն անգլերեն են, միջավայրը, որի մասին գրում եմ, ամերիկյան է: Սակայն այն ոգին, որ ստիպում է ինձ գրել` հայկական է: Ուրեմն` ես հայ գրող եմ»:
Հայոց Ցեղասպանության Հարյուրամյակի տարելիցի կապակցությամբ Ֆրեզնոյի Սուրբ Պողոս հայկական եկեղեցին սեպտեմբերի 27-ին կներկայացնի Վիլյամ Սարոյանի մասին վավերագրական ֆիլմը՝ «Վիլյամ Սարոյան՝ ՄԱՐԴԸ, ԳՐՈՂԸ» վերնագրով։ Տարբեր մրցանակներ ստացած այս վավերագրական Ֆիլմը հանդիսատեսին մեկ ժամ կպատմի մեծանուն հայ-ամերիկյան գրող, դրամատուրգ, հումանիստ, Պուլիտցերյան եւ Օսկարի մրցանակակների արժանացած Վիլյամ Սարոյանի կյանքի ու ստեղծագործությունների մասին։ Ֆիլմն արդեն հաղթող է ճանաչվել 6 միջազգային կինոփառատոններում, այդ թվում նաև արժանացել է “Լավագույն վավերագրական ֆիլմ” ոսկե մրցանակին։ ֆիլմը ցուցադրվել է ավելի քան 60 քաղաքներում, 19 երկրներում և դիտել է ավելի քան 1 միլիոն մարդ։
Ֆիլմը անգլերեն լեզվով է, ունի հայերեն սուբտիտրեր և պատմությունը պատմում են նույն ինքը Վիլյամ Սարոյանը և ամերիկացի դերասան Մայք Քոննորսը։ Ֆիլմի երաժշտությունը գրել է Փոլ Նազիկյանը, սցենարիստն ու ռեժիսորը՝ Փոլ Քալինյանն է։
Կինոնկարի պատմությունը սկսվում է Ֆրեզնոյում 1900 – ականների սկզբներից եւ շարունակում է նկարագրությունը ութ տասնամյակ` մինչև գրողի մահը։ Ֆիլմը լուսաբանում է Սարոյանի 60-ամյա գրական կարիերան, ներկայացնում իր պատգամը աշխարհին, պատմում իր հայրենիքի հանդեպ մեծ սիրո և կրքի մասին: Ֆիլմում Սարոյանը քննարկում է իր մշակութային ժառանգությունը, ներկայացնում է նրա կարևորության և ազդեցության մասին, այն մասին թե ինչպես է իր հայ լինելը օգնել դառնալու գրող։ Սարոյանը կրքոտությամբ խոսում է Հայոց ցեղասպանության մասին, Օսմանյան թուրքերի, 1915 թվականի և հայ ժողովրդի դիմացկունության մասին:
Նրա հայտնի եւ լայնորեն մեջբերված հաղորդագրությունները Հայոց ցեղասպանության մասին տպավորիչ են և հզոր։
Ֆիլմը կցուցադրվի կիրակի` սեպտեմբերի 27-ին, ժամը 12.30-ին` Սուրբ Պողոս հայկական եկեղեցու սրահում, որը գտնվում է 3767 N. FIRST փողոցում:
Կլինեն կինոգործիչներ և ցուցադրումից հետո տեղի կունենա նիստ, որտեղ հանդիսատեսն առիթ կունենա իրենց հուզող հարցերը տալ կինոգործիչներին։ Մուտքն ազատ է, և վերջում հյուրասիրություն կմատուցվի ։