«Տաշիր» ընկերությունների հիմնադիր, հայազգի միլիարդատեր Սամվել Կարապետյանը հարցազրույց է տվել ՌԲԿ-ին: Ներկայացնում ենք այն որոշակի կրճատումներով:
-«Forbes» ամսագիրը գրել է, թե ձեր հաջողության գաղտնիքը թաքնված է այն բանում, որ յուրաքանչյուր տարածաշրջանում դուք գտնում եք հայկական սփյուռքի ազդեցիկ ներկայացուցչի և նրա հետ գործ եք բռնում:
-Դեպքերի մեծ մասում դա այդպես է, յուրայինների հետ հեշտ է աշխատելը, սակայն գործընկերներին մենք ընտրում ենք հուսալիության սկզբունքով:
-Միևնույն ժամանակ դուք բազմաթիվ հետաքրքիր գործընկերներ ունեք ռուսաստանյան բիզնեսմենների շրջանում: Դուք ունեք «Георесурс» ընկերությունը, որի 25%-ը պատկանում է Արտյոմ Չայկային՝ գլխավոր դատախազի ավագ որդուն, այդպես չէ՞:
-«Георесурс» ընկերության հետ մենք Միտիշչիում՝ Յարոսլավլյան մայրուղու մոտ, կառուցում ենք «Ռիո» առևտրա-զվարճանքի կենտրոնը: Մենք ենք լիովին ապահովում շինարարության ֆինանսավորումը:
-Իսկ ինչպե՞ս ձևավորվեց ձեր համագործակցությունը Արտյոմ Չայկայի հետ:
-Ես հարգանքով եմ վերաբերվում Արտյոմ Չայկային, նրան համարում եմ արժանի բիզնեսմեն, նրան հետ անձամբ ծանոթացել եմ գործարքը կնքելուց հետո: Միտիշչիի նախագծում գործընկերության վերաբերյալ առաջարկը ստացվել է «Տաշիր» խմբի կողմից, որը պատասխանատու է բիզնեսի վարման համար: Ինչ վերաբերում է պարոն Չայկային, ապա ես գիտեմ, որ նա այժմ բազմաթիվ հետաքրքիր նախագծեր է զարգացնում և ակտիվորեն ներդրումներ է անում Կալուգայի մարզում:
-Եթե չեմ սխալվում, նա ե՞ւս գործընկերների թվում է:
-Այո, ճիշտ է: Մենք մասնակցում ենք «Газпром» -ի շինարարական նախագծերում և դրանք բազմաթիվ են:
-Մոսկվայի կառավարության նախագծերում դուք նույնպես հաճախ մասնակցում եք: Բավական շատ պատվերներ «Իմ փողոցը» ծրագրով ստացել է ձեր կառուցվածքը՝ «Կասկադ» հոլդինգը:
-Քաղաքի բարեկարգման նախագծերում մենք մտադիր ենք ավելի զարգացնել մեր հետագա գործունեությունը, և ոչ միայն Մոսկվայում, այլև այլ տարաշաշրջաններում: Այստեղ մի նրբություն կա՝ ստացվել է այնպես, որ ավանդաբար փողոցների ու ճանապարհների շինարարությամբ հիմնականում զբաղվել են հայերը: Դրանում մի տեսակ փոխանցելու, հետնորդության ինչ-որ ավանդույթ կա, և մենք մտադիր ենք դա պահպանել: Ինչ որ իմաստով դա կարելի է անվանել «հայկական բիզնես»: Սակայն մի կարևոր հարց էլ կա՝ ինչպե՞ս ստանալ նման նախագծերը: Կարող եմ միանշանակ ասել՝ հատուկ արտոնություններ չկա ոչ մեկի համար, իրականում դա շատ ծանր ու չափազանց պատասխանատու աշխատանք է: Միգուցե դա է պատճառը,որ շուկայում այժմ քիչ են նման ընկերությունները, որ կարող են աշխատել քաղաքի հետ ու գլուխ հանել:
-Աշնան սկզբին հայտարարվեց, որ դուք «Интер РАО»-ից գնում եք «Հայաստանի էլեկտրացանցեր» ընկերությունը: Ձեր ինչի՞ն է պետք այդ ակտիվը, որտեղ այդքան պարտքեր կան:
-Այո, պարտքեր ընկերությունն ուներ՝ մոտ 220 մլն դոլարի չափով: Ակտիվը գնեցինք, որպեսզի փակենք այդ պարտքերը:
-Ինչպե՞ս դա հասկանալ: Ի՞նչ է՝ բարեգործությո՞ւն եք արել:
-Ոչ, իհարկե, հասկանալի է, որ դա բարեգործություն չէ: «Հայաստանի էլեկտրացանցեր»-ը լավ ընկերություն է և երկարաժամկետ ակտիվ, այն կդառնա իսկ մեր կառավարման ներքո շատ ավելի լավը:
-Ո՞վ է ձեզ առաջարկել այն գնել
-Առաջարկել են «Интер РАО»-ում: Վերջնական որոշումը ընդունել է այն բանից հետո, երբ այդ մասին խնդրեցին Հայաստանի իշխանությունները
-Ասում են, իբր գնման մասին ձեզ խնդրել են Հայաստանի նախագահ Սերժ Սարգսյանն ու վարչապետ Հովիկ Աբրահամյանը այն բանից հետո, երբ Երևանում սկսվել են բողոքի ակցիաներ՝ կապված էլեկտրաէներգիայի սակագների բարձրացման հետ: Իշխանությունները վախենո՞ւմ էին, որ մարդիկ կարող են վերահսկողությունից դուրս գալ:
-Այո, խնդրել են Հայաստանի իշխանությունները: Մի կողմից, մենք ուզում ենք ընկերությունը կարգի բերել: Մյուս կողմից էլ՝ հասկանում ենք, որ դա հանրապետության համար ռազմավարական ակտիվ է, որն ազդում է երկրի ներդրումային կլիմայի վրա: Համոզված եմ, որ մենք ունակ ենք այն փոխելու:
-Գործարքը գումարայի՞ն էր:
Այո: Մեզ ոչ ոք այն չի նվիրել:
-Դուք հիշատակեցիք, որ ընկերությունը ձեզ բաժին հասավ 220 մլն դոլարի պարտքային բեռով: Կարելի՞ է իմանալ, թե պարտքի որ մասը դուք մարեցիք:
-Մոտ 20%-ը:
-Դուք տեսե՞լ եք հայկական մամուլում ենթադրություններն այն մասին, թե իբր դուք գնել եք այդ ակտիվը քաղաքական նպատակով, որպեսզի ձեր եղբայր Կարեն Կարապետյանը՝ Հայաստանի նախագահի աշխատակազմի նախկին ղեկավարը, դառնա երկրի վարչապետ:
-Տասը տարի է, ինչ այդ մասին գրում են, սակայն իմ եղբայրն այդ ժամանակահատվածում այդպես էլ չդարձավ Հայաստանի վարչապետ: Ինչ վերաբերում է «ИнтерРАО»-ի հետ գործարքին, ապա ասվածը դրա հետ ոչ մի կապ չունի: «Հայաստանի էլեկտրացանցեր»-ի գնումը մենք դիտարկում ենք համալիր՝ որպես բիզնես և օգնություն հայրենիքին:
-Ինչո՞ւ դուք գնեցիք «Հայաստանի էլեկտրացանցեր»-ը օֆշորային ակտիվների օգնությամբ:
-Դրանում ոչ մի տարօրինակ բան չկա: Իր կառուցվածքով դա շատ բարդ միջազգային գործարք էր, դրա մաքրությունը պահպանելու համար էլ դիմեցինք օֆշորային իրավաբանությանը:
-Դուք բավական շատ ընկերություններ ունեք օֆշորների վրա գրանցված: Դուք դրանք այդտեղից հանել չե՞ք պատրաստվում՝ ապաօֆշորացման մասին օրենսդրական վերջին նախաձեռնությունների լույսի ներքո:
-Մենք այնքան էլ շատ օֆշորների վրա գրանցված ընկերություններ չունենք, և այդ առումով մենք միշտ իրավական հիմքերով ենք աշխատում՝ օրենքի սահմաններում:
-Ընկերության որքա՞ն չափաբաժինն եք գնել:
-Մենք գնել ենք 100%-ը:
-«Интер РАО»-ն հաշվետվության մեջ դեռևս ցույց է տալիս 25%-ի վաճառք:
-Համաձայնության կառուցվածքն այնպիսին է, որ չափաբաժինները մեզ հասնում են մի քանի փուլերով: Ներկա պահին մեզ է պատկանում արդեն ակտիվների 50%-ը:
-Մինչև 2016 թ. վերջը դուք կունենա՞ք 100%-ը:
-Միգուցե, ամեն ինչ մեզանից է կախված:
www.hraparak.am
