<<Շանթ 2015>>
ՀՀ կառավարությունը վարչապետ Հովիկ Աբրահամյանի ղեկավարությամբ արտահերթ նիստ է գումարել ՝ քննարկելու ՀՀ Նախագահի՝ երկրում ռազմական դրություն հայտարարելու հրամանագիրը: Ավան վարչական շրջանում հայտարարված է պարետային ժամ, Երևանի հրապարակից շուրջ 35 ավտոբուսներով իրականացվել է բնակչության տարհանում, որի հաջող իրականացման մասին անմիջապես տեղեկացվել է քաղաքապետ Տարոն Մարգարյանին, տարհանումներ են իրականացվել նաև Կապանում, Տավուշում և Սյունիքում <<օդային տագնապ>> է, փախստականների համար վրանային ճամբար է ստեղծվել, վարչապետը հանդիպել է փախստականների հետ, ցուցումներ է տվել կառավարությանը փախստականների կողմից բարձրացված հարցերին լուծում տալու համար, Էրեբունի հիվանդանոցը համալրվել է 100, իսկ Արտաշատի հիվանդանոցը՝ 50 մահճակալներով՝ վիրավորներին ընդունելու համար, տարհանումներ են իրականացվել նաև մշակութային օջախներում…
Այս ամենը իրականում խաղարկային է և զորավարժությունների մաս է կազմում:
Սեպտեմբերի 3-ից 6-ը Հայաստանի տարբեր գերատեսչություններում իրականացվեց ուսումնավարժական գործողություններ, որոնք պլանային զորավարժություններ են՝ ներառված <<Շանթ 2015>> հրամանատարաշտաբային զորավարժությունների ծրագրում: Ծրագրի իրականացման դրույթները նախապես չեն հրապարակվել, սակայն յուրաքանչյուր գործողություն հստակ իրականացվել է՝ առանց բնակչության մեջ տագնապ առաջացնելու, որը և վկայում է զորավարժությունների բարձր մակարդակի մասին:
Պաշտպանության նախարարության ներկայացուցիչները, նշել են, որ համապետական նշանակության «Շանթ 2015» զորավարժությունը պլանային բնույթի է և նպատակաուղղված է պաշտպանությանը` պետության անմիջական նախապատրաստության և ագրեսիայի հետմղման ընթացքում պետական և ռազմական կառավարման մարմինների զորահավաքային նախապատրաստության, պատրաստականության բարձր աստիճանների բերման ունակության վերստուգմանը, փոխգործակցության և գործողությունների ներդաշնակության մակարդակի բարձրացմանը:
ՀՀ ԶՈՒ ԳՇ պետի տեղակալ, գեներալ-լեյտենանտ Մովսես Հակոբյանը, ամփոփ ներկայացնելով «Շանթ-2015» ռազմավարական հրամանատարաշտաբային զորավարժությունների ընթացքը, նշել է, որ զորավարժությունների վերաբերյալ ընդհանուր գնահատական կտրվի ավարտից մի քանի օր հետո: Մ. Հակոբյանի խոսքով` մանրամասն վերլուծվելու են նաև զորավարժությունների ընթացքում նկատված թերությունները, կազմվելու է թերությունների վերացման պլան, որը հաստատելու է երկրի նախագահը` գերագույն գլխավոր հրամանատարը: Այդ պլանի հիման վրա նախատեսվելու են միջոցառումներ՝ թերությունների, պրոբլեմների վերացման ուղղությամբ: